भोली देखि तनहँुमा लकडाउन

दमौली खबर संवाददाता
कोरोनाको महामारी बढेपछि तनहँुमा स्थानीय प्रशासनले बुधबार राती १२ बजे देखि लकडाउन घोषणा गरेका छन् । सूचनामा निषेधाज्ञा भनिए पनि प्रकृति भने पोहोरकै लकडाउनको जस्तै छ ।
लकडाउन वैशाख महिनाभर लागु हुनेछ । तनहँु प्रशासनले वैशाख २६ गतेको राती १२ बजे देखि लकडाउन घोषणा गरेको हो । पछिल्लो समयमा तीव्र रुपमा फैलिरहेको संक्रमण रोक्न कोभिड १९ संक्रमण रोकथाम तथा नियन्त्रणका लागि जिल्ला कोभिड १९ संकट व्यवस्थापन केन्द्रले निषेधाज्ञा गर्ने निर्णय गरेको सहायक प्रमुख जिल्ला अधिकारी चित्राङगत बरालले जानकारी
दिए । सोमबार जिल्ला समन्वय समिति तनहँुको संयोजनमा बसेको पालिका प्रमुखहरुको बैठकले तीन दिनभित्र निषेधाज्ञा गर्न संकट व्यवस्थापन केन्द्रलाई अनुरोध गरेको थियो ।

मंगलबार बसेको जिल्ला संकट व्यवस्थापन केन्द्रको बैठकले बुधबार राती १२ बजे देखि वैशास मसान्त सम्म अत्यावश्यक कामबाहेक घरबाहिर ननिस्कन र हिँडडुल नगर्न आदेश जारी गरेको छ । भेला, सभा जुलुस, जात्रा तथा महोत्सव गर्न निषेध गरेको छ । एम्बुलेन्समा बिरामी तथा कुरुवा गरी बढीमा २ जना चढ्न पाउनेछन् । दमकल, शववाहन, खाद्यसामग्री तथा पशुपंक्षीका दाना, खाद्यान्न तथा पेटूोलियम पदार्थ बोकेका सवारी साधनहरु भने चल्नेछन् । चिकित्सक तथा स्वास्थ्यकर्मीले ड्युटी जाने आउने क्रममा प्रयोग गर्ने सवारी साधनहरु, औषधी तथा स्वास्थ्य सेवाका सामग्री बोकेका सवारी साधन, अत्यावश्यक सरकारी कामकाजका लागि प्रयोग हने सरकारी सवारी साधनहरु पनि चल्नेछन् ।

लकडाउन घोषणा भएका जिल्लाभित्र यात्रुवाहक सार्वजनिक तथा निजी सवारी चलाउन पाइने छैन । धार्मिक स्थलमा जनस्वास्थ्यको मापदण्ड पालना गर्ने गरी नित्य पूजा, ध्यान र प्रार्थना गर्न पाउनेछ । सबै प्रकारका शैक्षिक संस्था, तालिम, प्रशिक्षण केन्द्र, सिनेमा हल, पार्टी प्यालेस, होटल, रेस्टुरेन्ट साथै साँझ, खेलकुद क्षेत्र सञ्चालन गर्न पाइनेछैन । विवाह, व्रतबन्ध एवं अन्य संस्कारजन्य कार्यक्रममा स्वास्थ्य मापदण्ड अपनाउँदै १५ जना कम व्यक्ति सहभागी हुन पाउने छन् । औषधी एवं स्वास्थ्य सामग्रीका पसलहरु २४ सै घन्टा खुला रहने, दैनिक उपभोग्य खाद्यान्न पसलहरु बिहान ७ बजे देखि बिहान ९ बजे र साँझ ५ बजे देखि ७ बजे सम्म मात्र सञ्चालन गर्न पाइनेछ ।

ढुंगा, गिट्टी, बालुवा, रड, सिमेन्टलगायत निर्माण सामग्री बोक्ने सवारी साधन र त्यस्ता व्यवसाय पसलहरु दिनको ११ बजेदेखि ४ बजेसम्म मात्र सञ्चालन गर्न पाइनेछ । त्यस्तै बैठकले ऋषिङ गाँउपालिका वडा नं २ देखि ८ र घिरिङ गाँउपालिकाका सम्पूर्ण वडा बाहेक अन्य क्षेत्रमा अत्यआवश्यक कार्य र सेवा बाहेकका कार्य र सेवा गर्न नपाउने गरी निषेधाज्ञा जारी गरेको छ । सञ्चारकर्मीको हकमा सूचना तथा प्रसारण विभागबाट जारी प्रेस पास, नेपाल पत्रकार महासंघबाट जारी प्रेस पास तथा सञ्चार गृहबाट जारी पासको आधारमा आवतजावत गर्न पाउनेछन् । त्यस आदेश अवज्ञा गरेमा स्थानीय प्रशासन ऐन,२०२८, संक्रामक रोग ऐन, २०२० एवं अन्य प्रचलित कानुनबमोजिम कारबाही हुने चेतावनी दिइएको छ ।