भानु नगरपालिकामा रिकभर परियोजना अन्तर्गत सयुक्त अनुगमन गरियो

दमौली खबर संवाददाता

भानु, फागुन १८

तनहुँको भानु नगरपालिकामा रिकभर परियोजना अन्तर्गत भएका विभिन्न क्रियाकलापहरूको अनुगमन गरिएको छ । भानु नगरपालिका अन्तरगत संचालन गरिएको कार्यक्रमहरुको प्रभावकारिता मापनको लागि नगरपालिकाका मेयर आनन्दराज त्रिपाठीको नेतृत्वमा सँयुक्त अनुगमन कार्य सम्पन्न भएको हो ।

रिकभर परियोजनाले गरेको आवास पुनिर्माण, जीविकोपार्जन र खानेपानी योजनाको स्थलगत अनुगमन गरियो । अनुगमनको क्रममा भानु नगरपालिका भानु नगरपालिका—२ मा रहेको ठुलोपँधेरो खानेपानी योजनाको पानी सँकलन ट्याँकी, पाइपलाइन, धारा र स्थानीयसँग योजनाको बारेमा छलफल गर्दा योजनाले स्थानीयको जीविकामा सहजता ल्याउने कुरामा सकारात्मक रहेको पाइएको थियो ।

“स्थानीयको समस्या समाधानको लागि नगरपालिका सदैव तयार रहेको र कुनै पनि बिकास सँरचनाको निर्माण गर्दा स्थानीयको अर्थपूर्ण सहभागिता भएको खण्डमा योजना दिगोरूपमा रहने र अपनत्वको भावना विकास भई योजनाको प्रभावकारितामा बृद्धि हुन्छ ।” मेयर त्रिपाठीले भन्नुभयो ।

रिकभर परियोजनाले २०७२ सालको भूकम्पमा परि विभिन्न जोखिमताको कारणले हालसम्म आवास पुनर्निमाण गर्न नसकेका अति जोखिमयुक्त घरपरिवारको लागि विभिन्न योजना अन्तर्गत आवास पुनर्निमाण गरिरहेको छ ।

सोहि वडामा निर्मित २ वटा पूर्ण सहयोगमा निर्माण गरिएका घरहरूको स्थलगत निरिक्षण गरि घर निर्माणको गुणस्तरियता र अन्य पक्षमा छलफल गरिएको थियो । चरम गरिबी, पर्याप्त जग्गाको अभाव, कार्यशक्तिको अभाव, भरपर्दो रोजगारीको अभाव आदि जस्ता समस्याहरूको कारणले जोखिमतामा परेका घरपरिवारको लागि नगरपालिकाबाट आवश्यक सहयोग गर्ने नगरपालिकाकी उप–मेयर उमा गोतामेले प्रतिबद्धता ब्यक्त गर्नुभयो ।

जीविकोपार्जनमा सुधार ल्याई योजना सहभागी (लाभग्राही)को जीवनमा सकारात्मक परिबर्तन ल्याउन परियोजनाले विभिन्न क्रियाकलापहरू गर्दै आएको छ । सीप तथा प्रविधिको हस्तान्तरण, स्थलगत ब्यवहारिक तालिम, नविन प्रविधिको अभ्यास लगायतका विभिन्न गतिविधि मार्फत भानु नगरपालिकामा कृषि तथा पशुपँक्षीजन्य उत्पादनमा सुधार ल्याएको छ ।

चुँदीबेशी खानेपानी योजनाको निर्माण गरि करिब ४२ घरधुरीलाई खानेपानीको सहजता प्रदान गरि खेरगएको पानीबाट कृषिजन्य उत्पादन गरिरहेको छ । यसै नगरपालिकाको वडा ४ मा कृषक पाठशालाको माध्यमबाट स्थानीयको तरकारी उत्पादनमा क्षमता बृद्धि गरेको सो पाठशालाका सँयोजक पुरुषोत्तम श्रेष्ठले बताउनु भएको थियो ।

कृषि ज्ञान केन्द्र तनहुँका प्रमुख कुलप्रसाद तिवारीले परियोजनाको प्राविधिक सहयोगमा स्थानीयले गरेको उत्कृष्ट व्यवस्थापन मार्फत लोभलाग्दो उत्पादन गरेको बताउनुभयो । “परियोजनाले प्रदान गरेको व्यवहारिक सीप तथा ज्ञानको हस्तान्तरणले स्थानीयको क्षमतामा सकारात्मक परिवर्तन ल्याएको र गैरसरकारी सँस्थाले प्रभावकारी रूपमा कार्यगरेको छ । आवश्यक सहयोग र समन्वयको लागि ज्ञान केन्द्र सदैब तयार रहेको छ ।” तिवारीले बताउनुभयो ।

भानु नगरपालिकाका प्रमुख प्रशासकीय अधिकृत दिपक प्रसाद खतिवडाले नगरपालिकाको तर्फबाट समन्वय र सहकार्यको लागि तयार रहेको र परियोजनाले वास्तविक रूपमै उत्कृष्ठ कार्य गरेको बताउनुभयो । त्यसैगरि सप्रोस नेपालका कार्यक्रम प्रबन्धक भानु लिम्बुले स्थानीय सरकारको रूपमा रहेको नगरपालिकाले प्राविधिक तथा प्रकियागत रूपमै आवश्यक बजेटको विनियोजन गरि कृषि, आवास र खानेपानी योजनाको निर्माण तथा पुनर्निमाणमा ध्यान दिन अनुरोध गर्नुभएको थियो ।

रिकभर परियोजना सिआरएस नेपाल, लमुन्ती आवासको लागि सहयोग समुह र सप्रोस नेपालको सहकार्यमा कास्की, तनहुँ, लम्जुङ्ग, मकवानपुर र चितवनका १५ पालिकाहरूमा सञ्चालित रहेको बताईएको छ ।