पौडेल राष्ट्रपतिमा निर्वाचित भएको खुसीयालीमा दीप प्रज्ज्वलन

दमौली खबर संवाददाता

तनहुँ, फागुन २६ गते

नेपाली कांग्रेसका वरिष्ठ नेता तथा पूर्व सभामूख रामचन्द्र पौडेल राष्ट्रपतिमा निर्वाचित भएपछि उहाँको गृह जिल्ला तनहुँमा दिप प्रज्ज्वलन गरिएको छ । देशको तेस्रो राष्ट्रपति बनेकोमा सदरमुकाम दमौलीका अतिरिक्त जिल्लाका अन्य स्थानहरुमा दीप प्रज्ज्वलन गर्ने लड्डु खाएर र खुवाएर खुसी साटासाट गरिएको हो ।

सदरमुकाम दमौलीको अनसन चौतारी चोकमा नेपाली कांग्रेस व्यास नगर समिति आयोजनामा नेपालको नक्सा बनाई दीप प्रज्वलन गरिएको हो । दीप प्रज्ज्वलन कार्यक्रममा सम्बोधन गर्दै नेपाली कांग्रेसका निर्वतमान सभापति वैकुष्ठ न्यौपानेले तनहुँको रिस्तीमा जन्मिएको किसानको छोरो जुन किसिमको उचाई प्राप्त गर्नु भएको छ सबै तनहुँबासी खुसी भएको बताउनुभयो । ‘व्यास नगरपालिकामा जन्मिएको व्यक्ति आज राष्ट्रपति हुनु भएको छ, निरन्तर जनताको बीचमा क्रियाशिल भएकोले सफलता मिलेको हो’ न्यौपानले भन्नुभयो । समग्र विद्यार्थी कालदेखि नै निरन्तर लोकतन्त्र र संविधानबादका आधारभूत मूल्यमान्यताका लागि पञ्चायतको कठोर क्षणमा अगाडी बढ्दै १४ वर्ष जेलमा बस्नु भएको कुरा न्यौपानेले स्मरण गर्नुभयो ।

राष्ट्राध्यक्ष भएकोले नेपालको नक्सा बनाई दीप प्रज्ज्वलन गरिएको नेपाली कांग्रेस व्यास नगर सभापति सूर्यचन्द्र हड्खेले बताउनुभयो । भानु नगरपालिका–२ को नारेश्वरटारमा नेपाल तरुणदल भानु नगरको आयोजना दीप प्रज्ज्वलन गरी खुसीयाली मनाईएको नेपाल तरुणदल भानु नगरका प्रवक्ता राजेश कार्कीले जानकारी दिनुभयो । यसैगरी व्यास नगरपालिका–१ भादगाउँमा स्थानीयले दीप प्रज्ज्वल गरेर खुसीयाली बाडेको सत्यवती माध्यामिक विद्यालयका शिक्षक अभिभावक सङ्घका अध्यक्ष सोमराज सिग्देलले जानकारी दिनुभयो ।

नेता पौडेल दोब्बर बढी मतले बिहीबार राष्ट्रपतिमा निर्वाचित हुनुभएको थियो । राष्ट्रपति निर्वाचन अधिकृतको कार्यालय अनुसार उहाँ ३३ हजार ८०२ मत भारसहित निर्वाचित हुनुभएको हो ।

राष्ट्रपति पदका अर्का उम्मेदवार पूर्व सभामुख एवम् नेकपा (एमाले) उपाध्यक्ष सुवासचन्द्र नेम्वाङले भने १५ हजार ५१८ मत भार पाउनु भएको थियो । नवनिर्वाचित राष्ट्रपति पौडेललाई नेपाली कांग्रेससहित नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी नेपाल, लोकतान्त्रिक समाजवादी पार्टी नेपाल, राष्ट्रिय जनमोर्चा, नेपाल समाजवादी पार्टी, जनमत पार्टी र नागरिक उन्मुक्ति पार्टी गरी नौ दलको समर्थन रहेको थियो । नेता पौडेलको जन्म तनहुँको व्यास नगरपालिका–८ रिस्तीमा भएको थियो ।